Puisi Pundukdawa

Catur Parahyangan Pundukdawa

Gita wirama, Tabuh lan solah-sesolahan Baris Rejang Gana masikian driki ring Pundukdawa, 

Hidup kahidupang antuk dasar manah suci nirmala,

Suara gentha Ida Pandita ngiringan puja, mantra, weda-weda, 

Sekha gita kidung matimpuh ngidungang wargasari nuhur Ida Bhatara Kawitan, 

Waluya kadi mayunan ring muncuk umbul-umbul kalawan penjore, 

Oncer canang sari sarasa magejeran, 

Guyub lebur masikian tur dahating ngulangunin

sajroning manah pretisentana Ida Bhatara Kawitan. 

Malih pidan tiang liang

Mangdane liang i riki ring Catur Parahyangan Pundukdawa,

Ring telengin parahyangan Ida Bhatara Kawitan. 

Ngiring sikiang pikayune mulet sarira, 

Ngrajegang warisan Ida Hyang Sinuhun pinaka perintis pasemetonan sami ring Pundukdawa, 

Ngaturang Karya Agung Tri Bhuwana - mabalik sumpah ring manah soang-soang, 

Anggen astra mantra dahating sakti, 

Pacang warisin oka-putune ungkuran, 

Budaya guyub kasarengin kasucian leluhur wantah katuju. 

Wentenke, bacikan ring pasemetonan hidup pasuka-dukan, selunglung sabayantaka

ngulangunin ring Pura Panataran Agung Catur Parahyangan Ratu Pasek Linggih Ida Bhatara Mpu Gana Pundukdawa, 

Para pangubhakti pretisentana Ida Bhatara Kawitan nembang nunas icha, mangda tetep guyub iriki, wentenke ?

Malih pidan tiang mati, 

Mangdane mati kapuput tur katibakin tirtha de ning Ida Pandita Mpu warih Ida Bhatara Kawitan, kaanterang kakawin prihantemen.