ONG Awighnam astu

Nihan tang ajñāna wiṡeṣa ring apaṡarīra, kayatnakna prakṛtanya, kalinganya ikang bāyu, mtu sangke Sanghyang Hurip, tuwur, mtu sangke Sanghyang Tunggal, hiḍĕp mětu sangke Sanghyang Wiṡeṣa.

Mwah kahanan ira Sanghyang Hurip, ri wkas ing bungkah ing ampru, ring tungtung ing tan hana, yȇkā wkas ing bungkah ing ampru., Sanghyang Tunggal, anewon tungtung ing hati sthāna. Sanghyang Wiṡeṣa hanȇng wkas ing wwad ning pusuh sthāna. Sanghyang Hurip, amtokakĕn bāyu, amārga ring hirung, rūpanya hirĕng. Sanghyang Tunggal, amtokakĕn ṡabda, amārga ring cangkĕm, rūpanya bāng. Sanghyang Wiṡeṣa, amtokakĕn hiḍĕp, amārga ring mata, rūpanya ṡweta, sangka nira, a, ña, na. A, nga., bāyu, ña, nga., ṡabda, na, nga., hiḍĕp, Êkajñāna, nga.

Iti Ajñāna wiṡeṣa.

Nāhan kawruhakna de Sang Paṇḍita, yan mĕnĕn langit, tan hana paran-paran ring apaṡarīra. Haywa mȇngĕt ing apaṡarīra, kewala lupa. Tan kabalik ing pasingsingan, mnĕng ing nora, mangkana gatinya, ingaranan langit, lwirnya. Lang, ngujar ring tan hana, ngit, ngujar ring adoh. Tan kinawruhan dohnya. Hana ta rūpa birū, katon ring luhur, ȇnak mahning malilangan, ya tika Sanghyang Kalĕpasan, nga., don ira ingaran Sanghyang Kalĕpasan, apan panlah Sanghyang Āditya, mwang Gandharwa, muni ktug, glap, sakweh ing aṣṭa dik, nga. Sakweh ing kumñar rahina wngi, tan tka panlahe ngkāna, hayo si wawayangan ing pṛthiwī tka ngkāna, apan durung hana bhuwana, guṇa nira wus hana samana, mapa ta lwirnya ? Apan mahning, tan hana mȇsi sira, tampĕk ing sarāt kabeh, de ning ṡakti ning bhaṭāra ngāstani (ngasthāni?), de ning pṛthiwī, tan klĕma de ning kaṡaktin ira maṡeṣa ing sor, ning ruhur, mangkana gati nira Sanghyang Kalĕpasan. Tan knȇng surūpa, apaḍang, ṡabda mȇngĕt satata tan knȇng gumingsira, manggĕh langgĕng, umnĕng juga ampĕki tan môlah, ya tika Sanghyang Kalĕpasan, nga., haywa kweh winarah.

Iti tgĕs ing langit, nihan kang pinangucapakĕn bolong. De Sang Mahā Paṇḍita. Akweh angucap mangkana, kadi kang wruha ring prakṛtinya. Kady angga ning wong angaku Hyang Dharma, Ṡiwa ya ujar ira, wong satus angujarakĕn Ṡiwa ya, pilih roro lamun tan sanunggal, pôlih prakṛtanya. Mȇwĕh wwang angucapakĕn bolong, yan tan katamanña ôlih manon ṡakti, tutur ṡakti, iḍĕp ṡakti. Ya tika rasa ning bolong, apan oya ring apa ṡarīra unggwanya, ndya ta panon ṡakti, nga., ? Tan kna ingalihan, tan kna ring urip, tan kna ring aptĕng, ya tika manon ṡakti, tutur ṡakti, nga., tan kna tuha pāti, iḍĕp ṡakti, nga., tan kna ring lali, mȇngĕt satata, tan pabalik lupa. Wyaktinya mangke juga ring apaṡarīra, lumaku tan pasuku, lumimbe tan patangan, angambu tan pairung, andĕlĕng tan pamata, angucap tan pacangkĕm, angrĕngö tan pakarṇa, mapa ta denta anutug i wkas ing aluhur mwang wkas ing i sor ? Ambutul wkas ing wetan, kulon, lor, kidul, tan hana mwah tutur ṡakti, manon ṡakti, iḍĕp ṡakti, sira tan hana waneh, tka ring kasiddhan, mwang kamokṣan, kalpasan kunang. Tan waneh tka ring pasuk mwang wtu, mnĕng kewala, wus pangawak nira, apan pangawak wnang sira, don ira inaranan mata sira, don ira haran ONG-kāra sira, mwang Praṇawa, Sanghyang Pramāṇa, Pramāṇa Wiṡeṣa, ingaran ; UNG-kāra, tan hana waneh panunggal ira Sanghyang ONG-kāra, juga sira mūlâkṣara. Sira wit ning mantra kabeh, matmahan Tryakṣara, mwang Pañcâkṣara, Pañcabrahmā, lĕwih ta manih akṣara rwa, mwang Ȇkâkṣara ngaranya, yan akṣaranya ; BA, Êkâkṣara ngaranya, amiṡeṣâkĕn akṣara kabeh, mwang japa mantra stuti, tan len, anghing Sanghyang ONG-kāra, juga mūla nira ngūni, anungsang mwang angadĕg, tka ring akṣara kabeh. Kewala prabhedanya, ring ṡāstra, pira-pira rūpa warṇa nira, amĕpĕk ing bhuwana, yan kna de ning anunggalakĕn, yȇkā Sang Paṇḍita, nga., Pa, nga., dūk anglakoni panas prih, Di, nga., dūk angrasa panunggal ira, Ta, nga., dūk anunggal rasa kang tan hana rasane, ring apaṡarīra, yȇkā Sang Paṇḍita ngaran. Mwah kidik (kḍik) dene angawruhi prabheda ning Sanghyang ONG-kāra tan kna de ning anunggalakĕn, yȇkā anmu swarga mokṣa, nga., yen kawĕngku sapôlah ing saprabheda ning Sanghyang ONG-kāra, yȇkā Paṇḍita wus anmu Sanghyang Kalpasan, makâdi tan wruha ring rūpa warṇa, saprabhedanya mwang unggwanya, den ujarakĕn, Ṡiwa ya. Tan wruh ring prakṛtanya, tan wruh ring paȇkan-ȇkan nira sowang-sowang, ikā ta anmu sanggahan jana parasol, nga., iti bolong.

Nihan krama ning sang sujana, yan sira ng aturū mantrâkĕn tang āwaraṇa, ndya ta ? Ma. :

“ONG, ANG, SANG, MANG, YANG, UNG, namah swaha”.

Yan matangi, mangkana uñccāranya, yan amanggih duṣkṛta ning ujar bhaya, samplah ning ṡabda, ya lumiwat ing setra, kabuyutan sarwangit, uccāraṇa juga Sanghyang Daṡâkṣara, apan sira mahāwaraṇa. Ndi ta kaprayogan ira ring ṡarīra lwirnya ; ONG, ṡirah ; ANG, kaṇṭa; SANG, ḍaḍa; MANG, hṛdaya; YANG, wĕtĕng ; UNG, nābhi ; tkȇng pāda kâlih, iti Sanghyang Daṡâkṣara.

Nihan krama ning yoga. Ikang sthūla anggakāra, sawiṣayanya hilangakĕn ing Ṡiwajñāna, sambuta tang Sadāṡiwajñāna, den tuhu mȇkatwakna Sanghyang Ātma, mwang Bhaṭāra Rya, huwus pwa ȇkatwa smṛtyang niṣkala jñāna sira ta pinakâwak Bhaṭāra Paramaṡiwa, tanak (tȇnak?) pwa den ta mayoga, kapangguh tang kayogīṡwaran, wyapi-wyāpaka ta sira sakala niṣkala, iti paramayoga, swarga mokṣa katmu denya, Ṡiwajñāna, nga., hiḍĕp mangilangakĕn pāpa kleṡa. Sadāṡiwajñāna, nga, iḍĕp nirmala stata. Paramaṡiwajñāna, nga., iḍĕp nirāwaraṇa, nga. Niṣkalajñāna, nga., iḍĕp tan pawastu, tan parūpa, tan pawarṇa, tan pahamĕngan, Iti Sanghyang Catur Ajñāna, Siddhânta nāma, papupulan ing sarwa sadyutama.

Nihan tgĕs ing Asanak ; Sa, nga., de ning wus anunggalakĕn rasa ning rasa, rasa ning rasa, nga., amatūt saujar ing rahayu, ujar ing nak. Nak, nga., tuhu yan ȇnak, marasa ring rahayu, paḍa apangawak ing walawidya, nga., tan hana pinakêpohan, tan ana sinandenya (sinandehanya?), yȇkā lwir ing asanak, nga., iti tgĕs ing asanak. Sanghyang Mūladwāra Kamala, nga., munggw ing pântara ning pāyūpastha, rūpa kadi skar tarate bāng, lawa, 3, i jro mȇsi apagni, rūpa kadi kukunang ring wulasan puluh. Sira ta kahanan ing Bhaṭāra Brahmāmūrti. Sanghyang Prantitya Kamala, nga., munggw ing patamwan (patěmwan?) ing cactik, rūpa kadi skar tarate bāng, lawa, 3, i jro mȇsi Sanghyang Anangku, rūpa kadi candra sasigar, minduhur sira munggw ing sor ing nābhi, sirâtma panangkan ing naḍī tiga, lwirnya : Iḍā, pinggala, suṣumnā. Iḍā, nga., naḍī tngĕn, hawan ing bāyu tkȇng hati, kasthityan Sanghyang Brahmā, warṇa nira kadi teja ning sūrya wahu mtu, minduhur tang bāyu tkȇng banawaha trus malunglangan, tkȇng irung tngĕn. Pinggala, nga., naḍī kiwā, hawan ing bāyu tkȇng ampru, kasthityan Sanghyang Wiṣṇu warṇa kadi teja ing candra atīs, mahning. Minduhur tang bāyu tkȇng rasawaha, trus manglunglangan tkȇng irung kiwā. Suṣumnā, nga., naḍī madhya, hawan ing bāyu tkȇng pusuh-pusuh, kasthityan Sanghyang Iṡwara, warṇa kadi teja ning apwi, ring yuganta sumunggu, minduhur tang bāyu tkȇng praṇawaha, trus malunglangan tkȇng mūrdhi. Luhur Sanghyang Anangga Sanghyang Sadācakra, nga., rūpa kadi skar tarate bāng, lawa, 6, i jro mȇsi ONG-kāra gni, rūpa kadi hurub ing dīpa, mañcĕr abnĕr kahanan ira ring pusĕr. Sanghyang Kawi Kamala, nga., munggwing luhur ring pusĕr, anggĕpok tungtung ing hati, rūpa kadi skar tarate bāng, lawa, 10, i jro mȇsi mrĕtya midĕr, sira ta kahanan Bhaṭāra Wiṣṇu mūrti. I luhur Sanghyang Hṛdaya Kamala, nga., munggwing tngah ing hati, rūpa kadi skar tarate bāng, lawa, 12, i jro mȇsi prāṇabāyu, jro ning prāṇabāyu mȇsi prāṇa lingga, rūpa kadi sphaṭika, sira kahanan ing Sanghyang Rudra mūrti. Sanghyang Merujwajakamala, nga., munggwing pusuh-pusuh, rūpa kadi skar tarate putih, lawe, 16, i jro mȇsi kadi wulan pūrṇama, jro ning wulan pūrṇama, mȇsi kadi ĕṇḍĕp-ĕṇḍĕp, sira kahanan ira Bhaṭāra Gurumūrti. Sanghyang Ṡuddhaningṡwara, nga., munggwing juluk, rūpa kadi skar tarate bāng, lawa, 3, i jro mȇsi nawa ratna, rūpa kadi netra ning joti (jyoti). Sanghyang Ṡweta Kamala, nga., munggw ing untĕk, rūpa kadi skar tarate putih, lawa, 1000, i jro ning lawa mȇsi kadi candra maṇḍala, rūpa kadi hawan ing wulan pūrṇama, i jro mȇsi adwija, rūpa kadi antiga, tunggal. Rūpa kadi sphaṭika nirmala, jro ning adwija mȇsi jotisa (jyotiṣa), rūpa kadi murub ing dīpa, mañcar tan môlah, jro ning jotisa (jyotiṣa), mȇsi windusāra, rūpa kadi ng tuṣāra munggw ing rwan ing kamala, jro ning windusāra, mȇsi bāyu ampana (apāna), mȇsi ONG-kāra, mȇsi ptĕng ḍĕḍĕt, tĕtĕt buntĕk tan pakukus, sira ta wkas ing pralīna, sira wkas ing awiwikon, kinñĕp de Sang Yogīṡwara. Iti astra pramāṇa, kȏttaman ira Sang Paṇḍita, bhujangga, aywa cawuh, aywa kweh wruh, parama rahasya, knȇng upadrawa.

Iti prayoga nira sang sādhaka, kawruhakna de sang mahyun asewaka yen kadi msat praṇawa. Hana tngĕran sang sampun wruh ri samaya pāti, dūk paningsĕt ing pramāṇa tunggal, Bhaṭāra rĕgĕpĕn, aywa kȇḍĕ, pucuk ing tinghal ira tiga, tunggalakna ri tungtung ing ghrāṇanta, simpĕn ta ring hatinta guhya, hati guhya, nga., wit ning wrĕdayanta, tunggalakna ring hila-hilat, ing praweṣa, nga., wit ning alĕd-alĕdan. Upti (Utpatti?) ring kawiṡuddha, nga., putus ing jala, tlĕng ing rāditya panon, arok ing amṛtajīwa, yen huwus tunggal pwa yȇrikā, pralīna ring pusĕr ing roma, pusĕr, nga., wit, wit, nga., mūla sangka ning māti, mūla sangka ning urip. Maring batur kawitan ing sarāt, sira pwângkĕn Ṡiwa, pwângkĕn mārga, lwih ring ṡarīra, sananya (asananya/sthānanya?) ring sla ning lalawya, ya pulur rasa, waneh amārga ring sĕr, siddhakning ḍaḍa, sla ning susunta, hana siwak ning dulit rambut, ya pwa lwih, iring mārga, tarengteng yan wiku angawruhana, batur kalawasan, nga., Acintya ṡūnya, nga., ya ta anggrit tan pajalada, apwa (apa pwa?) tngĕran nira ? Yan tka samayântaka, dĕlĕngĕn patitis paglangan tangan ira kalih, yan pgat pwa ya katon, age sira aglar angrāṇaṡika, nga., tkȇng kadhīran, pgat salwir ing tṛṣṇā, tamokna (temokna?) kadharman kapuruṣadhan, ri rahinta madyara, wus wruha lyat ring bhakti, winarah yan kalpasan, mapasah yan dalan ahurip ikā kang winisikakĕn, parok ning ātma lāwan hurip, ndi parok ika ? hana ring windu rahasya muka, windu, nga., panlas ing rasa, rasa pwa, nga., uttama ning manah, manah, nga., ātma ṡūnya nirmala, muka, nga., ṡabda aji, salek nahesu denya, yȇkā, nga., anganung (angadu?) pucuk ing ri, patitis paran ing lwah (lwih?). Ikā kaglar ing sang sādhaka, Ṡiwa Bodha uttama phala ning lumpas aywa wera, pinghitakna.

Nihan pawisik ira, sang wruh ring kasihanta, ri sang amanguni warah-warah sawkas ing paṇḍitaji, ikang sangkan paran ing lpas, sangkan panunggal ing hurip, saking wit ning rasa ya mâwak tunggal, umungguhanya pântara ning untĕk, nga., ya tungtung ing tuñjung asāri mās, ya kamaṇḍalu, nga., yan tka ring pralīna nira, hana panalikan ing pāti, panalikan, nga., atngĕr ing jro ning ṡarīra luhur, mungguh ri tungtung ing ikang ilat tuwuk ing kulungan, ya unggwan ira Sanghyang Saraswatī, ya ingaranan lugraha, ikā mrĕt ira dandan ing manah, manah, nga., Bhaṭārȇng rāt, ya ngaran mata tunggal, unggwanya tlĕng ing rahinta, lyan ikā langit, sor ing wunwunan, maring sor an alĕd-alĕdan. Pĕpĕtĕn babahan ikā, yan wus dadi pĕpĕt, babahanta kabeh, yan wus mangkana, tunggalana ring kuṇḍa rahasya, nga., tiga rwa, ring rasya, tujunĕn maring luhur, maring sla ning roma, wus tka rika, cĕt msat, patitis malih maring lwih, maring ṡūnya madal, parok ring Sanghyang Jagat Kāraṇa. Iti pangawruh sang sulābha yogi liwat pininghit rahasya tmĕn aywa cawuh.

Iti tngĕran ing rasa, den prayatna, awāskna ring jro ning angga nira, yan wuna salwir ing pangrasan ira, yan ring jaba, mwang jro ning awak, larad swaring ṡarīra, swaring ṡarīra, nga., gtih ya sira, nga., parok ikang rasa yatan sampun kadi ngūni, yan warasa, yan agringa, parĕk pāti nira, apan Sanghyang Pramāṇa sah saking rasa, tan tumkĕn rasa nira ring tala, de ning lagi angrara mangkana, sang āpah pramāṇa lagi, de ning bāyu nira parapah, kasilir de ning bāyu wedang, angin mawepa sāri ning irungta, rasa ning tutuk ta, rasa ning rambutta, yan wus samangkana katon pwa cahya ning uripta kadi damar wtu saking gidat. Katon de ning ṡoca nira tunggal, ikā jāti Sanghyang Manon, amārga titis ira, yan wus kawās pwa de nira, mahawan maring jro, saking jaba nira mahāpadma, nga., pusuh-pusuh, ñali, limpa, ungsilan, babwahan, inĕban, paparu, usus gung, yan wus ȇnak denta amgĕng bāyunta, ya katon pwa cahya ning daṡa pramāṇa, nga., parentunan (parantunan?) ing hurip, yan mtu saking pusuh-pusuh, kadi wintĕn cahya ning huripta, ya mtu saking naḍī, ñali, kadi wulan pūrṇama, cahya ning Sanghyang Ātmanta, yan mtu saking hatinta, cahya nika lwir sūrya wahu mtu, ya dalan ing pramāṇanta, yan hana mlĕng-mlĕng pwa katon mahning, hning ira kadi nora, ya cahya ning Sanghyang Manon, Sanghyang Naya, yan wus katon samangkana, ungguhakna ring windu sasika (saṡika?), nga., sla ning alista, irika parok ning sūrya candra mwang lintang, tāranggana. Sūrya, nga., hurip, candra, nga., ātma, lintang, nga., Sanghyang Pramāṇa, tāranggana, nga., Sanghyang Manon. Irikā umawanya trĕh hurip, wtunya saking wunwunan, yan amtwa ng ātma mtu sakȇng angghrāṇaṡika, kadi anak-anakan gaḍing ring harĕp ira, cahya ning Sanghyang Ātmanta, yan marĕp mtwang Sanghyang Manon, yan kadi kamumu, ri tungtung ing ilat, sakacang anom puyĕng ing ghrāṇanta, ya Sanghyang Manon, iku mtunya saking nora ning ṡarīra, nga., hning ing hatinta, ya ngaran spi-spi, ṡarīranta, ya ngaran sukama ning (sūkṣma ning?) yoga, yan wus wruh pwa ya mangkana, mawās ri watĕk pratyakṣakna ing ātma, watĕk pratyakṣa, nga., paran ing ātma lan huripta, lan dewa ning awakta, sangka ning jadma, yan māti, nora māti, nga., atingal (atinggal?) kurungan, nga., ikā reh ning angawās ātma, mwah pulung ing pramāṇa, bhinyāsakna kāla ning abrĕsih, palĕ-palĕhĕn kârĕpta, aja angaworin tṛṣṇā, suka, yan sira harĕp, waspada ring ātma nira, wiṡeṣa, dadi, naknika, hyang ing angupatatta (angupāta?) de nika, sawgung(sawagung?) denya ngupatāta, yan ring wngi sirĕpĕn buddhinta. Aywa angawaṡa, sūkṣmanĕn iḍĕpta, aywa limbak, laju amuṣṭi, patitis panmu ning inan limanta, de ning tinghal ira tiga, tmu ng tunggalakna tungtung ing ghrāṇanta, den kadi patingkah iḍĕpta, yen pwa wus ahȇnak de ya, yan katonton pwa de nira Sanghyang Ātma umtu saking sal (sla?) ning nirbāṇa nira acintya, ikā ta jāti Sanghyang Ātma nira wiṡeṣa. Aywa sangṡaya. Pahatĕguhĕn ring ajñāna, līlāwāraṇa iti tutur.

Iti tutur Samarabhuwana, nga., winarasa ring ṡarīra, sowang-sowang, hana Sanghyang Smara haran ira Ki Arūm, rūpa kadi mutehara. ONG ȇka paṡabdanya, sakarang lan istrīnya lwih, rūpa nira pahěsan hning sayojana göngnya, magnah jro ning talaga putih, amārga maring otot ing ṡoca kiwā trus sangkȇng malwangkanya, asalin palungguhan Hyang Asmara dadi Hyang Asmari, gaṇa mās, nga., sakaring lan istrī malih ta sira mayoga, I Bapa mangwijilang Sanghyang Tiga, mijil cahya Sanghyang Slĕng, Hyang Mlĕng. Hyang Somboro, dadi sira mâwak tunggal, tumibā marȇng dunya, magnah ring ṡoca, tan ing ulañjar (wulañjar). I Meme sira mayoga, mijil ta Sanghyang Roro, Hyang Kuminti, Hyang Paramacakṣu, dadi sira mâwak tunggal, tumibā ring dunya, magnah ring ṡoca nira ratu ulañjar (wulañjar) dadi Bapa atmu panon, dadi kumñĕp strī kakung, wahu pöh dṛḍa ya, Sanghyang Maṇik Arunmatra, nga., wahu makāma ṡweta, Sanghyang Karumatra, nga., wahu sanggarbining, Sanghyang Surakaṇṭa, nga., wahu mayogakāra Sanghyang Tīrtha Ñaning, nga., areka, nga., wahu ngareka, Sanghyang Tīkṣṇa, mātra, nga., sampun marūpa reka, Sanghyang Rarekula, nga., hana kang reka iki, harane Sanghyang Mlĕng, Sanghyang Paramacakṣu, Hyang Somboro, Hyang Kuminti, ikā ngreka Sang Rarekula, hana ṡabda dūk angreka; ANG, ONG (UNG?), MANG, ANG, urip, ing Brahmā, ONG (UNG?), hurip ing Wiṣṇu, MANG, hurip ing Iṡwara, hana pangĕmpunya sakȇng jro wtĕng, yeh ñom banah, ari-ari, gtih, ikā ngaran Sanghyang Redamūrti. Wahu abulan Sang Rarekula, ring jro ning wtĕng, Sanghyang Raremayā, nga., wahu tiga ng bulan, Sanghyang Sendurjāti, nga., wahu ptang bulan. Sthiti Kālaṡiwa, nga., ri sḍĕng Bhaṭāra Ṡiwa jnĕk maṡarīra kāla, Adikālaṡiwa, nga., pūrwaka ning Bhaṭāra Ṡiwa, Antah Kālaṡiwa, nga., wkas ing Bhaṭāra Ṡiwa maṡarīra kāla, ardhacandra, wkas ing sūkṣma mūrti Bhaṭāra, yȇkā kayatnakna kabeh, apan hinaranan Pañca Mahābhūta ṡatrun Sang Paṇḍita. Siweca, nga., suka, kāla ning Bhaṭāra mawak ing sanggama. Sūkṣmaṡiwa, nga., ring sĕḍĕng ing sūkṣma Bhaṭāra Ṡiwa, Sūkṣma Bhaṭāra Ṡiwa, nga., teja Bhaṭāra Ṡiwa, sūkṣma ta maṡiwa, nga., ri sḍĕng ing Bhaṭāra Ṡiwa, pinaka sūkṣma ning tamah, mahā sūkṣma, nga., ring sḍĕng Bhaṭāra Ṡiwa mawak sūkṣma nirbāṇa. Nāhan ṡabda upadeṡa, parama rahasya wkas ning warah guru ring ṡīṣya, an Sanghyang Amṛta Kuṇḍalini, mwang Sanghyang Praṇawa, nga., ndya ta lwir nira ? Kângkĕn kuṇḍa ikang angga pradhāna, dakṣiṇa apan agni tattwa. Ikang bamângga, apan talatattwa, mahurip i ye kali, isinya : prāṇa, madhya, bāyu, apan praṇawa awak ning wiṡeṣa, satata humiḍĕng tan cala, mnĕng, hnĕng, ngka ikā, wa., ha., kungku gumi tri bhuwana, prāṇa-prāṇa ikang sarwa sthiti munggw ing madhyana, kuṇḍa awaknya, alilibaknya amṛta, huripnya Sanghyang Praṇawa, pasamūhan ikā kabeh, yȇkā sinangguh jana wiṡeṣa, awak ning mangawruhi yan hana lāwan tan hana, pinaka kāraṇa ni siddha, mokṣa lpas Sanghyang Kuṇḍalini, warṇa kadi Sanghyang Praṇawa, awak ning niṣkala. Drĕs , matmaka, katattwa ning ātma, nyok jatma, tan pasang ātma, prayoktâtma, kapasang ning Sanghyang Ātma, lyate līna jayate, sang dadyakĕn samudbawah, angdadyakĕn, pada lāwan punarbhāwa, Wiṣṇu nāmanya, ONG-kāra jāti, kang kadadyan, lettatma ngkāna kintu, mangka ngūni, teja timira, ptĕng wasapta, ping pitung puluh rwa, api byakta, janti, sama lāwan samādhi, atīta ring kuna, sowah mwah mṛtyuñjaya, Sanghyang Mahâmṛta, hurip Bhaṭāra Paṡupati, kamlala, wit ning mūla hṛdaya, candi sah, tumpuk ning hati, kamūla Bhaṭāra Ṡiwa, mirkulpada, nandisah, tunggal lāwan ring tngĕn, gayātrī, strī paryaya, pawati, upaparyaya, Wāgīṡwari, umaparyaya, kusumangsa, ratih paryaya,. Bāsawa, ṡabda wiṡeṣa, prāsādakālaṡiwa, dög (dūk?) Bhaṭāra Ṡiwa ring sakala, kālakūṭa, wangkunya, Bhaṭāra Ṡiwa ring sakala, tamaṡiwa, Bhaṭāra Ṡiwa ring tama, Bhaṭāra Ṡiwa, wwah tĕntara, lwih ingan dyaning ṡabda, dhāraka, , umanggya tan hana, wiwilan, tantra, pūrwakan, jarayu (jarâyu?), ariṇī ṡāstra, srasti, kagawayanya, dṛṡya, agĕgĕl, srimat, sriwahati, Sanghyang wiṡeṣa, sangkanya Sanghyang Ṡiwa, ṡuddha. Tasmāt, wastu mangkana, padarta, tgĕs, pīta, kuning, pita āmbĕk, citta, bapa, rong ghora, kuning, warjitah, cyaktah, tininggalakĕn, saparoga wigatah, nora rāga wigatah, tan hana ring rāga, haradrara, bhūṣaṇa paramârtha, jñāna mahning Sanghyang Paramârtha, nga., parama, nga., wiṡeṣa, lwih kapadatanya, atanya, nga., kinawruhan, ring kabeh, padartanya i Sanghyang Iṡwarajāti, sira ri kāla ning Ṡiwa mūrti, tan turut ing hala hayu, ring sarwa jadma, tan tumūt ring waca, ri kāla ning mawak ri angkāra praṇawa, wyāpaka, nga., wiṡeṣa magawe, tyapa, nga., wiṡeṣa magawe tan kawiṡeṣan, kantĕnanya, wyāpakawya, sira wiṡeṣa tan kawiṡeṣan, mangawe jana punarbhāwa, kewalyatma Sanghyang Puruṣa, ANG-kāra makārya lalāṭa, lilitan ing jadma, kang inangguhan ṡarīran ring ātma, ONG-kāra Praṇawa. Mṛtyuñjaya, amṛta, hurip, Iṡwarangtĕga. Akaraṡca syakaraṡca, ukaraṡca pyukaraṇah, makaraṡcȇwa pañjete, warṇadena bedañca pañcamah, bāsaptati sahaṡraṇam. nabi madhyetyawa sthitah, tirya ṡurdya madastañca, wyapitah testu sarwatah, nabi hṛdaya wakṣesu, akarâkṣara sangsthitah, urtwawak sordacandreṡca, winduṡca sirasistitah, nadamulam ṡiwadwaram, nadadyam sikarastaram, nadan tantusika gneṡca, sarrute jyoti lakṣaṇah, brāhma wiṣṇu iṡwaradewah, sunyaṡca paramaṡiwah, nadamule stitodewah, sunyaṡca paramaṡiwa, madyaṡiwa paramasunyam, nadantewa ti sunyakah.

Iti yoga lakṣaṇa mahā wiṡeṣa nira.

“Padma bhawana tattwañca, aṣṭadewa dalam bhawet,

ṡiwah padmagrā sangyuktah, gandhakara sadaṡiwah.

Braāhmacakṣara wiṣṇuṡca, ṡabdacȇwa mahȇṡwarah,

waṡca kaṡca sadaṡiwah, ṡabdantah paramaṡiwah”.

Tri paksa lakṣaṇa iti.

“Amrĕtam warsayeh deham,guhyamrĕtamayam amrĕttam,

jihwagre sangstita nityam,amrĕtam warsayet sada”.

Iti mahâmrĕta ring ṡarīra, tan māti yan tan hana.

“Prāṇa rapano dana byana, bayawasa mano hrĕdih,

misritah mantra ṡarena, nawak ṡarena yatnatah”.

SA, BA, TA, A, I, A, U, MA, wyaktinya pātinya iti : ŌNG, A, U, MA. Kanirbāṇan, iti aṣṭa-ṡiwa, aywa cawuh, sĕngkĕr ring ṡarīra iki, mpungku, bhuh, bhwah, swamaha, jana, tapa satya.

Iti Sanghyang Samaya gaglaran pāti hurip, ping sornya mwang andĕlnya hurip, ping luhurnya pāti, SA, BA, TA, A, Ta (I ?),.

Nihan dewatā ning asabuk poleng, hulung, ya irĕng ing mata, hanȇng jro, ya leng ing hṛdaya, ya leng, nga., ya poleng, leng, nga., lyang, ya lyang ing bāyu ṡabda iḍĕp, ya rahasya, nga., ya parama ṡūnya, nga., ya kanirbāṇan, nga., warṇa kadi pucuk ing damar, ring tungtung ing poleng, ya parama cakṣu, nga., wtokakna(wtwakna) ri tungtung ing nayana karo, ya tunggalakna, prihĕn de nira, tan pawali manih, Pa, ya dewa ning poleng.

Iti Ṡrī Weroratna siddhi kawaka, hawanan niraji Jayabaya. Êkawati lokaḍatu, jronya mtu de nikang angkāra, milu ta pada Bhaṭāra kabeh, manganurāgana, sarāga pwa sira, dadi sira masuk, ri Bhaṭārī, Bhaṭārī masuk ri Bhaṭāra, ring hṛdaya Bhaṭāra, sira ḍatĕng Wiṡwabajra sira, Bhaṭārī dadi ta ŌNG-kāra, nilĕtpala (nīlôtpala?) kunang. Ikā katmu, ing bajra padma, mȇnak āmbĕk Bhaṭāra kabeh, masaput ring hṛdaya, tlas Bhaṭāra tumlar (tumular?) ing hṛdaya, mtu tang ŌNG-kāra sang yoga, ma. : ŌNG ratna drĕk. Mtu tang Bhaṭāra Ratna Sambhawa, saka ring naḍī nikang padma hṛdaya, Bhaṭāra Pīta mamuka kuning, dakṣiṇa pinge, mawak kṛṣṇa, tangan dakṣiṇa bajra, cintamaṇi, twĕk, mawa ghaṇṭā, paraṡu, pasu (paṡu ?), cakra, padma, nāhan ling nira; ma. ;

“ŌNG ratnaraja swambiryam, kabajrākasa nirmalam,

swabhawa suda nirlepya, basaguṇa namostute”.

yan musuh kapayu karĕpta, japa ring kanisika (kanāsikā?), winot ṡaraṇa, nga., ma. :

ŌNG ANG UNG MANG, ŌNG UNG wasat (waṡat).

Kahilanganana musuh, ma. ; ŌNG basundara ya namah. Tumūt dewī nira magawe mahâmṛta ning ṡarīranta, mwang kadīrghâyuṣa ning ṡarīra, saha prayoga, ma. : ŌNG daṡarati, mtu Bhaṭārī mamaki, mula kanaka warṇa, dakṣiṇa pīta, mawa sita, dakṣiṇa buja, bājra cintamaṇi, twĕk maganta, ratotpalakama. Ling nira, ma. :

“ŌNG twamwajracita, bhwanȇṡwara dharma dato,

trayangimam ratimanojña mahārtakame, kamaikañca na datwa, mahagrĕwando, yanecase jiwitu mahyamata”. Tlas.

Iḍĕp Bhaṭāra angrākṣȇng ṡarīra, awdi pwȇkang rāt, mwang sarwa ṡatrunta, dlĕng muṣṭika ning tangan, Bhaṭārī tumūt aweh tīrtha Kamaṇḍalu, angurip ing jīwanta, AH saking ṡiwadwāra, mangkana ling Bhaṭārī, ANG, mangkana ling Bhaṭāra, ONG mangkana linganta, putih sphaṭika warṇanya, sira hurip, nga., himpĕraknaha dalan ing māti, lāwan hurip, msat ring tlĕng ing kamala hṛdaya, trus malunglangan ring tlĕng ing keṡa wiṡuddha. Tlas.

Iti sing adi mahārata (mahāratha?).

Haywa weh wong lyan, saking dharma rāja. Tūs ning ārya kunang, apan larangan de sang sādhaka, tasyasih pwa sira, tumibā ring Ṡrī kaki ārya. Rĕmĕk ing ṡarīra, umor ing bāyu, langgĕng ing rāga, mulih maring tutur, ātma mulih maring iḍĕp, lpas luput ing ucap, tan kna ing iḍĕp, ANG AH, maring Paramaṡiwa paran, iḍĕp ātma ring wwang msat, maring Paramaṡiwa paran.

Iti panglĕpasan wwang māti. Sa., las, 33, wīja kuning, ḍukut lpas, haywa wera, panglĕpasan uttama tmĕn, wnang tan pajanma mwah. Amañjingakĕn ajñāna ring ṡarīra, ma. ; “UNG, AH, ONG”. Tlas.

Hrih linganta, irĕng warṇa, kambala, nga., luhur hṛdi mūla ye sthāna ning sūkṣma pada. Ikā ri Madhya ning hṛdaya, tikta nāmanya, ikang kṛṣṇa cmĕng, ikang atikṛṣṇa wkas ning atikṛṣṇa tônggwan Bhaṭāra Guru, ya loka, Bhaṭāra Nātha, ya sthāna Bhaṭāra Paramaṡiwa, nga.

Iti paḍang wiṡeṣa. Kewalya parama mūrta, praṇawa paṡupati sūkṣma nāma nira, iji ning parama kewalya Ṡiwa ṡūnya mūrti, angsa, ati ṡweta warṇa, parama ṡuddha nirāṡraya mūrti, paramaṡiwa ṡūnya jāti nira, nir rūpa, nir warṇa, nirguṇa, nir kāraṇa.

Praṇawa pañjara, nga., pañjara ning parunan ing parana. Pañjara, nga., kurungan, prāṇa, nga., urip, gawika, nga., gawasyah bawah, kadadi ng kawijilan ing ṡabda. Lambika, nga., tumayung prāṇa pañjara, nga. Himba, nga., gohika, nga., dalam tumpuk ning hati, uṇḍuh-uṇḍuhan, kalinganya, lambika, nga., pangañjungan ing pusuh-pusuh, mwah tutud. Tumayung, nga., pangantungan ing mārga ning kinawruhan, mangke haning (hanêng?) ṡiwadwāra, unggwan ing anginte, tangi mwang turū, mwah bnĕran ing bāyu, anrus marȇng ṡiwadwāra, ngkāna katon, kalĕyĕpan ing kayunya tan hinaranan, tutur, de ning amarakakĕn bāyunta saking hati, haywa sarag. Manah haywa wineh wyanga (wihanga), tutur den apagĕh, hilang ing tutur, yan ing aṡrayajñāna, nga., haywa malupa, madĕg ing pântara ning yogâṡraya, yan ing aṡraya, nga., tka ring pātinta, ikā inabhyāsakna sari-sari, katon hati ṡūnya ring ṡūnya, hana isi ṡūnya mȇsi ṡūnya, aganti-ganti pratītinya, ya spi ya hana, ya nora, ya tangi, ya turū, ya tangi. Ikang wwang tan wruh ing mangkana, mwang satwa paling kabeh, apan tan wruh ring sang inulatan, ring sangkan paran, mangkana ling ira Bhaṭāra, sira Brĕghu, yan ring sang siddha dewatā, ring Yawadwīpa, kambal, sa., kawaka ulung, maclĕk mās, ardhacandra windu nāda.

Iti ṡūnya wijaya mahāratha, nga. Kanirāṡrayan haywa wera, apan mūlya tmĕn, himpĕrakna tka ring pātinta, larangan de sang kuṇḍa ṡiwȏpakāra, yen tan abhiṣeka, haywa wineh amaca. Nihan de ning amantra bubutan. Iḍĕp Pañca Mahābhūta lwirnya : pṛthiwī, āpah, teja, bāyu, ākāṡa, wicakṣaranya sakȇng sindhunya, trus tkȇng tungtungnya, anūt ring pagantungan ing hati, rasa tkakna ring ampru, ingkāna pamuktya nikang amṛta. Malih durga rasa ring jihwâgra, tumurun ring ajñāna, trus mañjing ring hṛdaya, mwah manĕgĕsnya, campur, nga., tluh, ya ta durga mwang guṇa wiṡeṣa, añcangan ira Bhaṭāra Umā, mwang Bhaṭārī Durga, añcangan nira haran, i bhūta brĕgeñjong wadu nira ni gili gandruk, ikā ta kawruhakna rasa gnahnya, ring catuṣpatha, wiṡeṣanya ring nābhi, nga., setra mamnang, rasa dalĕmnya, panĕmbahanya magnah ring pukuh ing jihwā, nga. Ni Cili Mareka, wiṡeṣanya rasa agni mijil sakȇng tungtung ing nāda ring unggwan ira Bhaṭārī Durga, gnahnya ring tungtung ing jihwā, ya ta sinĕmbah de ning leyak kabeh, akutu-kutu ring deṣṭi leyak, rasa tibâkna ring catuṣpatha. Wus mangkana, wtwakna ikang Cili Mareka, gnahnya ring agra ning jihwā, parĕk lāwan Bhaṭārī Durga, Cili Gěndruk, rasa ri madhya ning jihwā, Bhūta Brĕgeñjong sor ing jihwā, wus mangkana tĕhĕr andewaṡraya, ring ajñāna rasa ki Bhūta Brĕgeñjong naḍī, dewī nira Sanghyang Antawiṡeṣa, Cili Mareka mañjingakna ring prapat maṇik, dewa nira Hyang Tunggal, Hyang Bhaṭārī Durga gnahnya ring dalĕm ing setra, wiṡeṣanya Sanghyang Taya, ya rasa maka panambahanya, ni Rangdeng Girah, ki wĕksirsa, ni lĕnda, ni lĕndi, ni larung, ni ugat, ni macan anggreng, ikā tâsananya paḍa makīrtya hala. Yan wus mangkana karasa de nira mangkana, iti pangiḍĕpanya, rasanya, ANG, swara ning nābhi, mtu gni murub, lwir sinyokan ing minyak, rasa agsöng sahana ning leyak kabeh, ŌNG rasa ning hṛdaya, MANG, rasanya. SA, BA, TA, A, I, bhūta mahāwiṡeṣa, nga. Ki Glö, Ki Bgā, Ki Gomarang, Ki Kalika, Ki Mingĕl, bhūta kang tan paharan, unggwanya bilang sandhi, de ning amijilakĕn ana otot, pangantungan kalewaran, anrus maring gurung-gurungan, trus marȇng wit ning lidah, lidah ta psatakĕn minduhur. Wus mangkana, tĕhĕr mijilakĕn sowang-sowang, madulur-dulur, sor ing lidah mārganya mtu, tka ring tungtung ing lidah. Mlat lidahta mijil pisan bhūta ikā, samangkana de ning angiḍĕp, ikā paḍa amawastra, paran kang sinangguh astra, bhūta kang ring sandhi-sandhi, hana kang dadi angin, dadi agni, dadi bāyu, dadi yeh, dadi gunung, dadi watu, yan harěp anunggalakĕn kawaṡa, sakârĕpta, yan ring jro ning hati, hati, unggwan anunggalakĕn, yan ring yawa, ring ṡiwadwāra unggwan anunggalakĕn, yan wus anunggalakĕn ikā ingaranan sarasampat. Wus sarasampat, mangaran Paṡupati, sara, ingaranan wiṡeṣa, sampat ingaranan pūrṇa, paṡu, ingaranan sañjata, pat, ingaranan karĕgĕp, tlas pwa denta angrĕgĕp, hana caru den asangkĕp, yan kāla ning bhūta mangan caru, Durga, nga., bhūta mūrti mahākāla, nga., yan wus mangkana, hana mantra salwir ing bubhūtan. Tlas.

Niṣkala jayate nadah, nadah windu samudbutah,

windoh samudbutah candrah, candrat wiswam samudbutah.

Ka., Sanghyang Niṣkala magawe nāda, nāda magawe windu, windu magawe ardhacandra, ardhacandra magawe wiṡwa, maka sajñā, ONG-kāra, mandĕl maring saptapadadi. Kunang Sanghyang Saptâtma, umandĕl maring saptapada, an sira pada Bhaṭāra umandĕl maring ONG-kāra, magawe tryakṣara, tryakṣara magawe pañcâkṣara, mwang pañca brahmā. Wyakti nira Sanghyang ONG-kāra, wijilakĕn, Ma-kāra, Ma-kāra wijilakĕn U-kāra, U-kāra wijilakĕn A-kāra. Mangkana tah kawijilakĕn nira Sanghyang Tryakṣara, sangke Sanghyang ONG-kāra sira wijilakĕn. Kunang ikang MA-kāra, wijilakĕn, I, mwang YA, ikang U-kāra, mijilakĕn A-kāra, MA namah. Ikang A-kāra mijilakĕn, SA, BA, mwang Ṡiwa. Nāhan Utpatti Sanghyang Pañcâkṣara mwang Pañca Brahmā. An mangke Sanghyang Tryakṣara ikā, mwah kapralīna nira, umĕt ri kāraṇa nira sowang-sowang. Wyakti nira hanȇng ṡarīra, iḍĕp ta ya munggw ing padma hṛdaya, Sanghyang Praṇawa gumawaya, tryakṣara, mwang pañcâkṣara, pañca brahmā.

Iti Sanghyang Praṇawa, haywa wera rahasya tmĕn sira.

Ikang pañcâkṣara, rājakna.

“Pratamañca namah lopyang,

akarañca wajayate,

widyamcah lāpyañcah,

Ukarañcah wajayate”.

Ikang namah dadya kāra, ikang Ṡiwa dadya U-kāra. Tryam. Trityam ya kāra lapyam, MA, kārañca wajayate. Dwityakṣarah lāpyami, U-karañcȇwa jayate.

Ikang tri akṣara lopyakna, sangkṣepanya dadi ONG-kāra, sakarañcȇwa lopyañca, urdañcȇwa twinyacet, ikang Ma-kāra matmu, tan windu lunggw ing luhur ing ŌNG-kāra ŌNG.

Ikang ingajarakna ṡiwa ing ikang prakṛti, sang, ra karasta, la karasta, agni saryaprakīrtitah, hȇkarȇkara ko karah, candra ṡuklah ṡiwa martah, agni, nga., aghora, sūrya, nga., tat puruṣah, ru, nga., agni, la kāra, nga., sūrya, hȇkāra, nga., candra, sādhya, ai-kāra, trĕh ṡukla. Ṡukla, nga., Brahmādewa, U-kāra tmah ṡiwa, nga., igama.

Ra kāra namayo buta, la kāra mamayastata, hȇkara siriti proktah, ai karo naracayapoh.

Ikang ra kāra tmahnya, ikang la-kāra tmah Ma. Ikang ȇ-kāra tmah Ṡi, ikang ai-kāra tmah Wa. Ikang ŌNG-kāra tmah YA. Nāhan lwirnya Sanghyang Sapta ONG-kāra apwi, Sanghyang Saptâtma Yajamanaha.

Ṡarīrang kuṇḍa mitruktam, ŌNG kara windanantaku,

saptŌNGkara mayobagni, awyam bojyanta sarwyada.

Sarwa sarana yat saram, pañca brahmanigadyata,

pañca saram dayat saram, tryaksara nigadyate.

Triyaksarananta yatsaram, pranawanti nigadyate,

pranawanta yatsaram, sunya mȇwa prakirtitah.

Tuhun kalkasanya pināti kabeh, cyajet ṡūnya nira karam, tyajet karma subhâsubham. Tyajet dharma madharmamwa, tyajetñanantah mamayam, skala niṣkala tyakta, nitya-nitya wiwajayet. Byakta-byakta parityajya, upadeṡa nigadyate.

Iti pūrwa bandhakoṭi. Karĕgĕpan ing bāyu. ANG ṡabdanya, umibĕk ing ṡarīra, sūrya rūpa ikang ṡarīra. Hilang ikang ṡarīra linpasakĕn de ni bāyu, AH ṡabdanya, mukṣa tan pahamĕngan tan hana pasuk wtu ning bāyu, i sḍĕng ing layu (bāyu?) tan hanatah, samangkana atah awalingan ing nirāwaraṇa, nir akṣara rahina sadākāla, pinakâwaknya, numara nirbāṇa, cintamaṇi, samādhi, nga. Kapin pitu ning samādhi, meh muliha ring kôlihan, amanggihakna kamokṣan, kayatnahakna tmĕn-tmĕn. Sira tan dadya drĕs ya de ning len. Dadi warah winarahakĕn irika ng wwang. Tlas.

Iti Sanghyang Kamahayanikan.

Nihan krama ning daṡȇng kȇng pusĕr dudug ring hati, tkȇng ṡirah. Kunang kramanya, kapata yama pang kabeh, prasārita kramanya, yan ring nābhi akaṇdha, kahananya tunggal, ikâwaknya, ya medha nga., hana pwa ring hṛdaya, nga., sasuluh awaknya, yan ring talu pwa ya, pāt likur kwehnya, kunang yan ring ghrāṇa, tri awaknya, kȇngĕtakna sang mahyun lpasa.

Dugagata jiwah,

askara mantra sangyuktah,

jiwagram talu sangglistam,

lulya sangglistam locanam.

Iti pañca paramârtha, mahāswarah lalampahan sira.

Purastadiswarastapya,

brahma dewañca dakṣiṇa,

pastimantu mahādewahm

weṣṇawet tarakantata,

madye ṡiwañca paramam,

jatwadewi sangyogawit,

prana mudra trayogena,

udagat watu parwatamah,

pranawajñāna matena,

cihna prana sangyogawit.

Jiwagram talu sangglistam,

tulya sangglistam locanam.

Mangkana de sang wruh ring yoga sandhi, sara lampah-lampahan, Sanghyang Praṇawajñāna, kang kna twĕ, pamgatan ing urip nira.

Kapalam bayunodbyah,

ṡiwadwāra winirtitah,

prana sajantita dwaram,

pranawanta winirgitah,

pranahyajantita dwaram,

pranawañca winirgitah.

Blah kapalane de ning bāyu, katinggal tkȇng ṡiwadwāra, kewalya sang praṇawa juga duhur nira.

Cihna pranastu yoh yogah,

wisate paraman jiwam,

wyapi sarwagatas cȇwah,

suksma tat paramaṡiwa.

Hilang pwȇkang prāṇa mantuk ing Sanghyang Paramaṡiwa, mapa ta lwirnya, kanaha (kahana?) nira rāt kabeh, denya tunggal, mwang Sanghyang Paramaṡiwa, tlas ṡūnyâtmaka sira.

Sadārudram idam jñāna,

Sadāṡiwa midargatah,

Sadāṡiwa midajñāna,

Paramaṡiwanggatah.

Iti Sanghyang Praṇawajñāna, Sanghyang Sandhi, hina mwang bhāra nira. Puput.

Iti Sanghyang Praṇawa jñāna samāpta, tinḍun de Cakraning Kṛṣṇa, ring wway, Pwa, Ṡu, wara Kulantir, Kedaṡa māsa, Iṡaka, 1936. Masehi 04 April 2014.