Om Awighnamàstu Namàsidhem,
Ling Bhatara duh tanayan mami Hyang Kāla, hana pasungi bapanta riko, yan hana wwang tan bhakti ring kawitanya, mwang tan bhakti ring dewa, yatika wang tadhahanta. Mwah yan hana wang tan manut ring ling ning aji, waneh wang tanpagama, anganggo salah ukur amuji kawanganya dawak, yeka wang wênang tadhahanta.
Wanéh yan hana wang salah ukur, salah krama, alpaka ring rama réna, ring sang prabhu, ring guru kunang, maka dirining sang pandhita, yeka wang tadhahanta. Kunang yan hana Pañca yadnya tan manut ring ling ning aji, wënang ika tadhahanta. Waneh yan hana graha salah ukur tekeng natar palëmahannya tan pasukat, ndan lawanganya tan pasukat, hanganggo taru rebah tan pantara, mwang taru tan mrangkung sarah, salwiring sinangguh cacad ari nging aji, yeka wang tadhahanta, sang wang kreti mangkana.
Mangke wënang kita waranugraha kang wang kabéh, tingkahing manut pakarangan, wehana galar galir ri wates palëmahan, asing wang langgyan ri warah, wënang kita nadah wang mangkana, ling Bhatara Guru mangkana.
Wawang mojar Bhatari Umà, lahya kamung Hyang Kàla, mene bapanta aweh tadhahan riko, ri sedengning kreta treta nedha ninunta, ri dwapara lawan kali aweh tadhahan ri kamu, saka phala ta kawarana tadhahan denta jemah, mangkana ling Bhatari Umà. Suka girang buddhi Sang Hyang Kàla, amanggih phala bhoga tambeyan.
Tucapa Bhatara Guru manih, menget ri wekasan, tan kayeng dangu dangu kamet ri ya nira, an mangke katekan krodha, angapa asamanapa Bhatari Umà, matëmahan Pañca Durga, melik pwa sira ri gatra nira, kaya kaya tan mangawasakenang bhuwana, lawan sarira, mene sinanggapa nira Bhatara Guru, matëmahan Kàla Ludra Mayà rupa, lumaku ta sira maka ring maka ring desantara, mamet unggwanira Srì Parwati Pañca Rupa, ri madyaning Pañcaka, Pañca Desa tunggwa nira Srì Durgapurwa, Rajidurga Utara, Sukasmidurga Pascima, Daridurga Daksina, Dewi Durga ana ring madya, malocitta pwa sira, pada hyuni kalima, arep anggawe tetumpur agung rumacanang wisyamandhi, jeg dhateng Bhatara Kàla Rudra manembah ta Srì Pañcadurga prasamasangga ta nira, irika Srì Bhatari Durga ngadakaken kalika kaliku, yaksa yaksi, dengen spah, kubandha, Bhatari Rajidurga ngadakaken babahi, jukih, jin setan, bragala bragali, Bhatari Sukasmidurga ngadakaken sampung, pamala pamali, karaseta, Bhatari dewi Durgadari ngadakaken preta, sajer, Bhùta kapiragan, Bhatari Madya Dewi Durga ngadakaken Pañca Bhùta, Bhùta Janggitan, Bhùta Langkir, Bhùta Lembu Kanya, Bhùta Taruna, Bhùta Tiga Sakti.
Mangkana lingnia, ikang semasana wënang ingaranan Pañcaka, apan unggwanira Bhatari Pañca Durga saha ardhanareswari mwang Bhatara Kàla Rudra. Lagi Mahà sireng Catuspata, masanggata mwah sira ngadakaken catur Bhùta, sang Drambamoha, Sang Kàla Ngadang, Sang Kàla Wingsa, Sang Kàla Katur. Lagi sira tumameng Salwa Agung, pinalih aranira, Bhatari Durga, maka ngaran Sang Kalika Mayà, Bhatara Kàla Rudra, maka ngaran Sang Juta Srana, masanggata sirengkana, mijil Sang Kàla Tiga, maka ring Sang Bhùta Raja, Sang Kàla Putih, Sang Kàla Bang, Sang Kàla Kuning,
Sang Kàla Ireng, lawan Sang Bhùta Pung, Sang Bhùta Dadu, Sang Bhùta Kwanta, Sang Bhùta Ijo, waneh Sang Bhùta Tasuwat, Bhùta Walang Kerik, mwang Bhùta Sañcaya, akweh yan wuwusën.
Ong byakta raksasa rupanca
Webaksya twam capunah
Somya rupa mawopnoti
Twam wande waradham aum.
Ong krura raksasa rupanca
Wyakta ya rakta locanem
Prape noti santo rupatwam
Twam wande tri purantarem
Ong Ong kala bhucaibyo namah swaha
Ong bhuta raja maha krurem
Saharsa kirana pradham
Sadwaktrem sayutascewam
Sakala swahitang karem
Ong maha raksasa dasa bhujah
Hiranyem garbhode sembawah
Bhuta preta simang rudhah
Naga yadnya musubitah.
Asuwiya ta angen angen Sang Hyang Tri Samayà, i lampahira Bhaþara Guru, winastunggwanira matëmahan Kàla Rudra krura rua, malo citta pwa sira, katiga, maka nimita somya rupa Bhaþara Guru maluya jati Úiwa, angringgit rakwa sira, waluya tinatah nira, mintonaken Mayà rupa Bhaþara Guru, lawan detya kabéh, mwang Sang Hyang Kàla Nucara, ginerahita Mayà Bhatari, i telas mangkana, umahà Sang Hyang Tri Semaya mamet unggwanira Sang Susuhunan, amurungaken manadah manusa, kapanggih Sang Hyang Kàla Rudra aronrowan lawan Bhatari maswana ring buwat Salwa Agung mapanjang, Bhatara Kàla Rudra maka nama Sang Juti Srana, Bhaþari Durga maka nama Sang Kalika Mayà, mangkana gopita Bhatara Bhatari.
Meruh Sang Hyang Tri Semaya, lumaris mares ri Bhatari pati, majaraken lampahira Sang Sasuhunan, kinon Úrì Aji Galuh mangarpanaken saji nira, ikang caru Pañca Siya mwang rah dagingnia tasak mentah, jangan lawan asem, carbaka mwang mulaphala, pinuja de Sang Mahà Pandita, maka phala tan ruganing naga reng Galuh, tekapira Sang Kàla Rudra, sira nimitaning hana caru ring Yawa Dwipa, masinggih Srì Bhatari Pati, kadi ling Bhatara Tiga, kunang cihnaning Sang Ratu Subagyawirya, tan wilambi ta Umàdang pada sanaha, Bhagawan Siddha Yoga mangalyaning Pañca Siya nira, pinten lwirnia, sinasar ring lemah, ri arepaning Salwa Agung, ginaweyaken Panggung Sang Hyang Tri Semaya, kumenaken kelir ningawayang, Bhatara Iswara udipan, rinaksa de Sang Hyang Brahma Wisnu, ginamelan dening kecapi, rinoruwad pamancang, mwang gulaganti, sinamening langon-langon winahyaken lampah Bhaþara kalih, Sang Hyang Kàla Rudra lawan Bhaþari Durga, sira puwekaning hana ringgit ring yama mandala, tinonton ring wang akweh.
Somya ta ambek Bhatara Guru mula tilalakon Sang Hyang Iswara, kinon pwekang Bhùta kabéh mamukti caru , merang pwa sira Bhatara Bhatari, sampun tinagga Pañca siya Srì Bhatari pati, i rika wadwa cara nira kabéh, salwiring Bhùta Kàla dengen, mawaraguwaregan padha somya rupa, tan wanya mambek irupya, dinulur kasaktining japa mantra nira sang Rsi Siddhayoga, sinagara tang sarwa Bhùta, kinon mantuk ring sunyata, waluya Siwa Jati rupa, mintur Sang Hyang Kàla Rudra mwang dewi nira, keranging wadocara nira sadaya.
Mwah ana pamanggahan kidul wetaning nagara Galuh, sema kaliasem ngaranya, patamputing pamasaran sawaning wang mati saloring gunung, lawan wetaning gunung, ngirika ta unggwan Bhatari Durga lawan Sang Hyang Kàla Rudra kawapita de Sang Hyang Tri Semaya ri Srì Bhatari Pati, mwah sira mangutus ngarpanaken tadhah saji nira kayeng lagi, mwah rah daging sarwa mangsa, saha panggung ning ngawayang, mwang angringgit Sang Hyang Iswara, tumuturaken lampah Bhaþara nguni, tan duwa somya wit ta Bhaþara Kàla Rudra, malwi Siwa rupa, mintur swa sira umegil ring wadwa dusun dusun, tinuduh de Bhatara Tri Semaya, magawe pwa sira methen, Bhayara Iswara dadi Swari, Bhatara Brahma dadi Peret, Bhatara Wisnu dadi Tekes, tumandang angigelsira, angidung mbandagina, lagia tumuturaken lampah Bhatara Kàla Rudra, ndah suksma sira mantukeng Siwa Loka,walwi Bhatara Guru sira.
Ndah paramagarjit angen angen Sang Hyang Tri Semaya, maka phalang jerembana kriya nira, sira nimitaning hana wayang mwang menmen nguni katekeng mangke
Kunang Bhatari Pañca Durga, kari haneng Sema Kaliasem, sarwa daksa sira, keringin Bhùta Kàla kabéh, padha nara mangsa nitya Kàla sukan sukan, hametwaken Mahà Berawa, ndah henengaken ikang kata sekareng.
Ong mrana bhuta mararem
Sri damba dara yanganem
Sri mantra trigata swara
Sri daradhi maha mantrem
Ong agni madya rawicewa
Rawi madya candrma
Candra madya sukla bhawet
Sukla madya stiwa-tiwa.
Tucapan Sang Hyang Kàla mabayangan lampahira kateka tekeng bhumi yawa nira, Mayà Mayà rupa nira, tan wareg ta sira Umàngan sarwa mambekan, sakweh sesining alas muwang wadwa dusun, pira kunang nwehing wang padha weruh i tekaning patinia, hanan pejahing rahina ana ring wengi, sapuluh pejah sapisan, satus eled kapisan, binuru de Sang Hyang Kàla, len wang mati tiba ring jurang, hana kalebu ri walahar, padha kasyasih manangis masambatan prasama astawa Sang Hyang Widhi, sigra tumurun Sang Hyang Tunggul, mabhawa manusa wredha stri lilu, angalangana Sang Hyang Kàla amangan wang.
Gumanti Sang Hyang Widhi marupa Suku Tunggul, amara walampah Sang Hyang Kàla, tan duwa krodha Sang Hyang Kàla, angalangi laku nira, ping pat ping lima katekan ping satus, sinikepi nenga Mayà nira Sang Hyang Tunggul, sadra umelek kukusi de sira Sang Hyang Kàla, umangan ikang sato suku Tunggul, mwah sinambut nira tekeng wang stri wredhah, ping sapta inele nira, umer juga sira ri arep Sang Hyang Kàla.
Kemengan manah Sang Hyang Kàla, manangis makidupu manembah ring jöng wang stri wreddah, aminta sanmata kaluputan lampahira, irika tumingal tekang wang kabéh, numudeg ala ayu manonton gati nira Sang Hyang Kàla, kadi wang siwosiwopa katonia, padha sahur manuk ikang wang kabéh, sinengguh iccha Sang Hyang Widdhi, padha nembah makidupu haminta jiwita, jeg datëng Bhatara Guru mwang Bhatari Umà, ngaku waning wija nira Sang Hyang Kàla, ngampuni kang luputaning tanaya nira, ri jongira Sang Hyang Tunggul, ndan kapwa inuduhira para wang kabéh. Laki biha sulung sulung sumuyug datëng manembah, ri suku nira Bhatara tiga, ndan ling nira Bhatara Widdhi kabéh.
Lahyang kita wang kabéh, aywa kita nedha tan menget ri kami, kami mulaning sariranta, kami Sang Hyang Guru Reka, angreka sesining rat kabéh, kami sinangguh Bhatara Widdhi, dewa hyang kawitanta kabéh, kami manunggal ri Sang Hyang Siwa Umà Kàla, kami masarira Sang Hyang Brahma Wisnu Iswara, menget kita kabéh.
Mangke wang kita samuha, magawe kita sanggar kawitan tiga srana, saduluk saduluk pawetuwanta kabéh, apan mabeda beda swakawitaning wang, pada mijiling Pañca Siwa, yang paramartha tekeng kami, kami utepeti stithi linaning wang, aywa kita korupamoh, ri tataning Pañca paramartha, maka nguni kita manembah saswiring mapindha sarwa sato, kami waranugraha, apan kami wang marupa sato, hengetakena aywa lupa.
Ong pretiwi dewa sampurnem
Apah teja jiwatmanem
Bayu akasa premanem
Durgha yusa jagatrayem
Ong Rang Ring sah wasat, prama siwa
Panca maha bhuta byonamah swaha.
Maka hetu bhaktinta ring kawitan, mwah yang kita tatan stithi bhakti ring kawitanta, Sang Hyang Kàla pinaka tadhaneng kita, ring tataning Pañca yadnya, ana weh prabedaning jagat, hirika kiwa sitwa, wang magawe ala ayuning jagat, mangke kinon kung lahya kena subha asubha phalaning Pañca yadnya kabéh, dewa Kàla anggon wani tyasa, kunang tekaning yuganing bhumi, Kaliyuga sariranta yan mangkana, wang kita magawe sanggar ring rat, sumurup ri manahing wang, kita pinaka lingganing catur yuga.
Kunang mangke ana wang pinakastrinta,wijanirayamaloka, makebu Bhatari sadhana, we kaliku buwana ngaran ika, yatika amet anta rowanganta dresti stri tilinaning jagat, ndan weruh swa kita amanggehaken swadharmaning jagat, aywa alangana kita, tasmat tan waluya dewa muwah, samangkana ling
Bhatari hyang Widdhi, manembah ta Hyang Kàla, mur data ri hyang tanpamengan.
Tumangga manah nira Sang Hyang Kàla, saha nembah amwit lumariseng yamaloka, angayap ri Sang Hyang Dharmaraja, padha prati patitambek, samabuhayah, suksma Bhaþara Guru, mwang Bhatari Umà, nuladeng Mahàmeru sira.
Om Tang Ang Ing Sang Bang Ung Ca Tat
Om Gunung Gangga dipataye.
Om Hreng Rajastraya namah.
Om Phat-phat,
Om Ang-Sura bhalaya namah.
Om Ung Cakra bhala ya namah.
Om Sang Bang Tang Ang Ing
Panca Maha bhuta bhiyo namah.
Om Shànti, Shànti, Shnti Om.
Tidak ada komentar:
Posting Komentar