TEMBANG MLAJAH RING SMP EMPAT

TEMBANG MLAJAH RING SMP EMPAT

Olih: I Gede Sugata Yadnya Manuaba, S.S., M.Pd

PUPUH GINADA

1. Pamurwaning atur titiang

Ring Ida Hyang Saraswati

Pinaka sarining Tatwa

Mangda Ida ledang asung

Mapaica kaweruhan

Sisia sami

Ring SMP neg'ri empat

2.    Eda med melajah sastra,

sesai nto pelajahin,

anggon manyuluhin raga,

ala ayu pang katepuk,

ring sekala lan niskala,

nging da banggi,

bané ngelah kawisésan.

3.    Sekenang déwa malajah,

eda ima eda lekig,

yaning ririh nyén ngelahang,

mula kéweh ngalih sulur,

pradé pelih ban nyulurang,

ngamong urip,

pét rusak kéweh nabdabang

PUPUH GINANTI

1.    Ampahé mekrana bingung,

sangkaning laksana pelih,

males tur lekig melajah,

wetu kiapé sesai,

pesu mulih ngutang lampah,

tusing ada né ka alih.

2.    Gradag-grudug tanpa unduk,

medasar demen melali,

mangulahang ané gampang,

pejalané bingung paling,

ngalih galang nemu halang,

twara bakat né ka apti.

3.    Yaning teleb sinah tepuk,

dyastu ané sulit-sulit,

tatujoné janten sida,

pengalangé dadi ririh,

mlajah ring SMP empat,

majalaran jemet rajin.

ARTOSNYANE :

PUPUH GINADA

1. Pamurwaning atur titiang =

Pinaka pangawit atur titiang. 

Ring Ida Hyang Saraswati =

Katur ring Ida Sang Hyang Saraswati. 

Pinaka sarining Tatwa =

Ida pinaka sarining tutur miwah sarining sastra mautama. 

Mangda Ida ledang asung =

Dumogi Ida setata mapica asung kerta waranugraha. 

Mapaica kaweruhan =

Ngicening sekancan pangeweruhan. 

Sisia sami =

Ring para siswa-siswi sinamian. 

Ring SMP neg'ri empat =

Sane wenten ring sekolah SMP Negeri empat puniki. 

2.    Eda med melajah sastra =

Sampunang merasa ajerih, kenyel melajahang sadaging sastrane. 

sesai nto pelajahin =

Punika patut serahina wengi pelajahin turmaning tincapang. 

anggon manyuluhin raga =

Setata anggen sepat siku-siku maparilaksana, nyikutang raga. 

ala ayu pang katepuk =

Sumangdane prasida nepasang, sane kasenguh jelek kelawan melahe 

ring sekala lan niskala =

Bilih-bilih ring kauripan puniki sekala puniki, turmaning prasida anggen bekel ke niskala. 

nging da banggi =

Sampunang melaksana branggi utawi merekak utawi sombong. 

bané ngelah kawisésan =

Risampune akeh madruwe kabisan. 

3.    Sekenang déwa malajah =

Telebang nyen i dewa nunas paplajahan. 

eda ima eda lekig = 

Sampunang Ima utawi ragu-ragu miwah lekig utawi campah

yaning ririh nyén ngelahang =

Risampune prasida dueg, waged, pradnyan, sapa sira benjangan sane jagi kasenggug nruwenan. 

mula kéweh ngalih sulur = 

Gumantin ipun meweh ngerereh ngeruruh suluh, gaguat sane becik. 

pradé pelih ban nyulurang =

Yening iwang antuk natasang geguat punika

ngamong urip =

Anggen ngempu ri sekari mauripe

pét rusak kéweh nabdabang =

Yening pelih iwang meweh pacang mecikang sulur hidupe. 

PUPUH GINANTI

1.    Ampahé mekrana bingungbingung =

Ampah campah, cerobohe ane ngawinang kapetengan, ampah mapala baya, yatna mapala lasia. 

sangkaning laksana pelih =

Ulian parilaksane sane nenten patut

males tur lekig melajah =

Mayus miwah campah cangkah cumangkah

wetu kiapé sesai =

Sapunika sane ngeranayang setata arip utawi kiap ring kauripane. 

pesu mulih ngutang lampah =

Lemah peteng pesu mulih, uli jumah mapanganggo sekolah, di sekolah tuara ada ngenah sahasa setata ngutang-ngutang pejalanne. 

tusing ada né ka alih =

Turmaning tusing ada ane alih saratang ring geginane punika. 

2.    Gradag-grudug tanpa unduk =

Kema mai gradag-grudug tusing ngelah unduk tan patetujon. 

medasar demen melali =

Ulian ngetohang demen melali lemah peteng. 

mangulahang ané gampang = 

Nyaratang ane alih aluh, ulah aluh. 

pejalané bingung paling =

Pejalanne tusing ngelah tatujon sane pastika. 

ngalih galang nemu halang =

Kenehe ngeruruh mana galang apadang, nganging ewuh pa kewuh sane katemu. 

twara bakat né ka apti =

Nenten janten sane karuruh. 

3.    Yaning teleb sinah tepuk =

Wantah parisolah sane jemet pacang manggihin sane bicik. 

dyastu ané sulit-sulit =

Yadiastun pikobete sane kapangguh punika meweh pisan. 

tatujoné janten sida =

Pastika prasida nemu sane utama. 

pengalangé dadi ririh =

Mewehe punika patut entasang mangda sida nemu kapradnyanan utawi kautaman. 

mlajah ring SMP empat =

Punika tatujon utama iraga nunas peplajahan ring SMP Negeri Empat Abiansemal puniki. 

majalaran jemet rajin =

Para sisia maka sami mangdane setata jemet, tan surud-surud ngeruruh aji pangeweruh ring para Guru miwah Pegawai iriki. 

#tubaba@griyangbang//ikatunanngawitgita#