Dharma Wacana Pawiwahan

PAWIWAHAN MANUT AJAHAN HINDU

Om Swastyastu.

Inggih, Ida dané sinamian sané banget wangiang titiang; Para angga upasaksi pisinggihin titiang; Taler para uleman sané tresna asihin titiang. Sadurung nglanturang matur, lugrayang titiang ngaturang puja pangastuti miwah pangayubagia majeng ring Ida Sang Hyang Widhi Wasa, duaning sampun majanten wantah sangkaning pasuécan-Ida, mawinan titiang miwah ida-dané kénak rahajeng, saha prasida mapadu wedana sakadi mangkin.

Ida dané sinamian sané wangiang titiang. Ring galahé sané becik puniki, titiang jagi ngaturang dharma wecana sané mamurda “Pawiwahan Manut Ajahan Hindu”. Bantang bebaosan puniki ambil titiang, manut kadi sane kajantenang olih Dinas Kebudayaan Kabupaten Badung. Tetujonnyané, mangda anom-anomé, taler krama Hindu Baliné sayan ngwikanin saluir katatwaning ajahan agama Hindu, utaminipun paindikan pawiwahan.

Ida-dané sinamian. Manut UU Nomer 1 warsa 1974, Pawiwahan inggih punika iketan sekala lan niskala pantaraning krama lanang sareng krama isteri sané matetujon ngwangun kulawarga alit sané sukerta santih malarapan panugrahan Ida Sang Hyang Widhi Wasa.

Sajeroning Pustaka Manawadharmasastra wénten kabaos, tetujon pawiwahan inggih punika Dharma sampati, sané mateges mungguing pawiwahan marupa silih tunggil swadharma sané patut kalaksanayang antuk krama Hindu manut ajahan Catur Asrama, mawinan sang alaki-rabi nglaksanayang Dharmasastra, Artasastra, miwah Kamasastra.

Yéning iketang ring ajahan Catur Purusaarta, ri jeroning masa Grhasta Asrama, krama Hindu sampun nglaksanayang Tripurusa, yaitu Dharma, Artha, miwah Kama. Purusa kaping papat (Moksa) pacang sida kaulati yéning sampun karihinin antuk ngalaksanayang Grhasta miwah Wanaprasta utawi Saniyasin.

Malarapan pawiwahan puniki sang alaki-rabi pacang molihang pamargi hayu nglaksanayang dharmaning suami miwah dharmaning stri, pinaka guru rupaka, pinaka pianak mantu, dharmaning ipah, dharmaning parajana (masyarakat sosial), miwah dharmaning umat maagama.

Malarapan kawéntenan punika, pawiwahan taler pinaka yadnya kanggen mungkah galah para leluhuré numateng malih

ngamolihang galah ngamecikin yasa kertinnyané. Indiké puniki manut daging sloka 2 Pustaka suci Sarasamuscaya kadi puniki.

Ri sakwehning sarwa bhuta, iking janma wwang juga wenang gumaweakenikang subha asubha karma, kunang panentasakena ring subha karma juga ikang asubha karma pahalaning dadi wang.

Tegesipun:

Saking amunika akéhnyané sarwa mahuripé ring jagaté, sané kamijilang pinaka jadma kéwanten sané prasida malaksana hayu miwah kaon. Mungguing pinaka palebur parilaksana kaon manados sané becik, punika wantah pikenoh/pabuatan manados jadma.

Mapaiketan ring daging sloka ring ajeng, wantah malarapan numateng dados jadma iraga pacang sida nguwah asubhakarmané manados subhakarma. Ngembasang sentana saking pawiwahan raris ngupapiranya becik-becik wantah marupa punia yadnya ring kawitan. Bilih-bilih yéning anaké alit sida kapiara saha katuntun manados sentana sané suputra, kabaos pinaka pabuatan nglintangin satusan yadnya. Asapunika kabaos ring Slokantara.

Ida dané sinamian, indik asapunapi tatacara nglaksanayang pawiwahan kabaosang kadi asapuniki.

1) Pamargi sané biasa manut sulur pepadikan, ngerorod, jejangkepan, miwah ngunggahin.

2) Pamargi sane nénten biasa inggih punika pawiwahan nyeburin.

Ida dané sané wangiang titiang. Indik sahnyané pawiwahan wénten penyangaskara antuk bhuta saksi miwah déwa saksi. Taler maweweh manusa saksi saking prajuru adat miwah dinas. Pinaka puaran hukum ring pawiwahan Hindu Bali, sané lanang madeg purusa, sané istri madeg predana, raris pretisenta sané embas patut ngranjing ring kulawarga purusa.

Sané mangkin ngiring baosang, napi tetujon pawiwahan punika? Tetujon utama pawiwahan, ngwangun kulawarga alit sané

sukerta santi sekala miwah niskala. Sekalané prasida negepin pabuatan artabrana pangupajiwa, niskalané kasidhan ngulatiang kahuripan sané kabaos santi miwah trepti, malarapan setata bhakti ring Ida Sang Hyang Widhi Wasa. Sajaba punika madué tetujon mangda prasida ngembasang pretisentana sané jagi nglanturang kahuripan kantos ka wekasan.

Ida dané sinamian. Indik pepalihan pawiwahan wénten kasurat ring Pustaka Suci Manawa Dharmasastra kadi puniki.

1) Brahma Wiwaha: Pawiwahan sané kaping singgih, kulawarga predana milihin calon mantu saking wangsa luih, wikan, lan wicaksana.

2) Dewa Wiwaha: Kulawarga predana milihin calon mantu saking anak lanang sané sadhu gunawan polih ngwantu nylametin kulawargan sang pawestri.

3) Arsa Wiwaha: Pawiwahan sané kacumponin riantuk sang lanang mawit saking kulawarga sugiharta.

4) Prajapatya Wiwaha, wantah pawiwahan sané madasar pikayunan pada arsa, inggian sang dampati makakalih maweweh pacumponan kulawargannyané.

5) Gandharwa wiwaha, indik pawiwahan sané madasar pikayun pada tresna, sané nénten wénten campuhan pangaptin kulawargannyané.

6) Pawiwahan Sadampati, pawiwahan sané kamargiang antuk upacara tingkatan nista wantah ngutamayang upakara pokok sané manut kecaping sastra.

Ida dan sinamian, sané mangkin jagi atur uningayang titiang indik bebantenan upcara pawiwahan.

1) Béakala, simbol penyucian “sukla swanita” (wiwit raré) saha pinaka Bhutasaksi

2) Tegteg daksina peras ajuman, ring Sanggar Surya kanggén nunas kasaksian Bhatara Surya lan Siwa, ring Lebuh kanggén nunas pasaksian Bhatara Wisnu, saha ring arepan Pandita kanggen nunas pamuput.

3) Hulu banten marupa tegteg daksina peras ajuman ring arepan balé pawiwahan.

4) Kalih pajegan woh-wohan kagenahang ring tengen maka niaya pradana, miwah pajegan bunga-bungan ring sisi kiwa maka niasa purusha.

5) Taledan marepat, pinaka aled utawi tatakan banten, maka niasa catur weda.

6) Tumpeng kalih, mawarna barak-putih, barak maka niasa kama bang (isteri) miwah putih niasa kama petak (lanang). 7) Endog bebek rebus asiki maka niasa wiwit raré kagenahang

ring madianing tumpeng sané kapacekin sekar bang-putih 8) Kalungan sekar barak-putih maka niasa kukuhnyané iketan

tresna asih pawiwahan.

9) Segehan aperancak limang tanding, kagenahang ring sorin sanggar surya, béakala, balé pawedaan, balé pawiwahan, miwah ring lebuh, sebagai sembahan kepada bhuta kala. 10) Tegteg daksina peras ajuman ring pasirepan pengantin

kanggén nunas pasayuban ring Bethara Semara-Ratih mangda sang alakirabi nemu karahajengan.

Inggih, Ida dané sunamian. Napi luir sané katur i wawu prasida kacutetang mungguing pawiwahan wantah upacara pamarisuda sang alaki-rabi nganutin tri upasaksi, sané matetujon ngwangun kulawarga sukerta santih kantos kawekas malarapan panugrahan Ida Sang Hyang Widhi Wasa.

Inggih kadi asapunika titiang prasida ngwedar katatwaning pawiwahan, mogi-mogi wénten pikenohipun. Manawi ta wénten atur titiang sané nénten manut ring arsa, titiang nunas anggung pangampura. 

Om Santih Santih Santih Om.